د کندهار له لارې د انځرو صادرات دوه برابره زیات شوي؛ سږ کال نږدې ۳۰ زره ټنه انځر بهر ته لېږدول شوي
۵ لیندۍ ۱۴۰۴ هـ.ش
۵ جُمَادَى الثانی ۱۴۴۷ هـ.ق
د کندهار د کرنې، اوبو لګولو او مالدارۍ ریاست د معلوماتو له مخې سږ کال له کندهار څخه بهرنیو هېوادونو ته د انځرو صادرات ۲۹ زره او ۷۸۴ ټنو ته رسېدلي، چې د تېر کال په پرتله د پام وړ-تر دوه برابره زیاتوالی ښيي.
د کندهار دکرنې ریاست د راپور له مخې، د ۱۴۰۴ کال په اوږدو کې له کندهار ولایت څخه د انځرو صادرات د کرنې ریاست، سوداګرۍ او پانګونې خونې په همغږۍ او د افغان ملي سوداګرو په مالي ملاتړ ترسره شوي دي. د چارواکو په وینا، سږني صادرات د پخوانیو کلونو په پرتله بېسارې زیات شوي او د انځرو ډېری محموله متحده عربي اماراتو، هند، انګلستان، پاکستان، چین، کاناډا، نیپال، المان او سعودي عربستان ته لېږدول شوي دي.
د کندهار د کرنې ریاست چارواکي وايي، دا زیاتوالی د بڼوالۍ د پیاوړتیا، د صادراتي لارو د اسانتیا، د سړو خونو او بستهبندۍ د مرکزونو د فعالېدو، او د خصوصي سکتور د پراخې ونډې پایله ده.
د کندهار دکرنې ریاست چارواکي وايي، چې په ۱۴۰۳ کال کې له کندهار څخه ۱۳ زره او ۲۰۶ ټنه انځر صادر شوي وو، خو سږ کال دا کچه ۱۶ زره او ۵۷۸ ټنه لوړه شوې، چې د هېواد د صادراتي سکتور د ودهموندنې څرګند شاخص بلل کېږي.
د ا.ا.ا چارواکي ټینګار کوي، چې هڅې یې روانې دي څو د هېواد د صادراتو کچه نوره هم لوړه، د وارداتو اړتیا کمه، او د افغان سوداګرو لپاره نړۍوال بازارونه پراخ شي.
