هلمند کې د برسلوز ساري ناروغۍ د تشخیص لپاره ډاکټرانو ته د سمپل اخیستنې کيټونه ووېشل شول
۲۷ لړم ۱۴۰۴ هـ.ش
۲۷ جُمَادَى الأول ۱۴۴۷ هـ.ق
د هلمند ولایت د کرنې، اوبولګولو او مالدارۍ ریاست اړوند د مالدارۍ او حیواني روغتیا امریت د برسلوز ساري ناروغۍ د تشخیص لپاره د سمپل اخیستنې ځانګړي کيټونه ووېشل شول.
ددې پروسې په ترڅ کې د مرکز او اوو ولسوالیو ۱۴ تنه مسلکي حیواني ډاکټران شامل وو، چې د دغو کيټونو په مرسته به د څارويو له وینې څخه نمونې راټولوي.
برسلوز هغه ساري ناروغي ده، چې له حيواناتو څخه انسانانو ته انتقالېږي، او د کنټرول لپاره يې په حیواناتو کې وختي تشخیص خورا ضروري دی. یاد ډاکټران به د ورکړل شوو کيټونو په وسیله د ۹۸ راسه څارویو څخه د وینې نمونې واخلي. دغه نمونې به د ځانګړو تخنیکي شرایطو مطابق مرکزي لابراتوار ته لېږدول کېږي.
تر لابراتواري معاينې وروسته به د مرکزي لابراتوار متخصص ډاکټران څرګنده کړي، چې آیا په هلمند ولایت کې د برسلوز ناروغي شتون لري او که نه. که چیرې دا ناروغي موجوده وي، نو د درملنې او وقایې لپاره به اړین اقدامات او ترتیبات عملي کېږي.
