هلمند کې د کب روزنې مخ پر وده صنعت؛ هره میاشت ۳۰ زره کیلوګرامه کبان تولیدېږي
۱۹ لړم ۱۴۰۴ هـ.ش
۱۹ جُمَادَى الأول ۱۴۴۷ هـ.ق
د هلمند ولايت د کب روزنې فارمونو د ټولنې چارواکي وايي، چې په دغه ولايت کې د کبانو د روزنې صنعت د پرمختګ په حال کې دی او اوس مهال د کبانو مياشتنی توليد شاوخوا ۳۰ زره کيلوګرامه ته رسېږي.
د هلمند د کب روزنې فارمونو د ټولنې رییس قدرتالله، وايي په وروستيو کلونو کې د خلکو لېوالتيا د کب روزنې ته زياته شوې او د کبانو زرګونه فارمونه په دغه ولايت کې جوړ شوي دي. نوموړي زياته کړه، چې په تېرو دوو اوونيو کې له دوو زرو زيات فارمونه ثبت او راجستر شوي دی.
د ده په وينا، د هلمند د کب روزنې فارمونو توليدات نه يوازې د سيمې په سیمه ییزو بازارونو کې پلورل کېږي، بلکې د کابل، کندهار او غزني ولايتونو ته هم صادرېږي. نوموړي زياته کړه، چې که یادې برخې ته لا زياته پاملرنه وشي او پانګونه په کې وشي، هلمند کولای شي په لنډ وخت کې د کب د توليد په برخه کې ځان بسيا شي.
قدرتالله وويل، چې د فارمدارانو له اساسي اړتياوو څخه يوه دا ده چې د کبانو چوزې (هيچري) د توليد يو مرکز جوړ شي، څو د سوېل زون اړتياوې په دې برخه کې پوره شي.
په همدې حال کې، په هلمند کې د کب روزنې يو شمېر فارم لرونکي هم د خپلو چارو له پرمختګه خوښي څرګندوي. شاهمحمد، د ناوې ولسوالی اوسېدونکی، وايي يو کال مخکې يې د درې زره د کبانو بچي فارم پيل کړی و، او اوس د ده د يو شمېر کبانو وزن له يو نيم کيلوګرامه څخه هم اوښتی دی.
همدارنګه، صاحبجان صابري، چې په لښکرګاه ښار کې د کبانو فارم لري، وايي په اته مياشتو کې يې له خپل فارم څخه چې دوه زره د کبانو چوزې په کې پالل شوي و ښه حاصل ترلاسه کړی دی. نوموړي له پانګهوالو وغوښتل، چې د دې صنعت د ودې او د کاري فرصتونو د رامنځته کېدو لپاره په هلمند کې پانګونه وکړي.
د هلمد ولایت د اوبو له ډېرو زېرمو او له تود اقليم سره، د هېواد له هغو مناسبو سيمو څخه شمېرل کېږي، چې د کبانو د روزنې لپاره غوره دي. کرنيز کارپوهان هيله لري، چې دا برخه به په نږدې راتلونکي کې د هېواد په سويل کې په مهمه اقتصادي سرچینه بدله شي.
