د کرنې وزارت د اراضۍ لوی ریاست کې د للندر (شاه توت) بند د ځمکو د تصفيې او بیې ټاکنې په موخه تعقیبيغونډه دايره شوه
۱۷ وږی ۱۴۰۴ هـ.ش
۱۵ رَبِیعُ الْأَوَّل ۱۴۴۷ هـ.ق
د کرنې وزارت د اراضۍ ریاست کې د للندر (شاه توت) بند د ځمکو د تصفيې او بیې ټاکنې په موخه غونډه دايره شوه . په دغه غونډه کې د کرنې وزارت د اراضۍ لوی ریاست د استملاکي پروژو د همغږۍ رییس شاه جهان جلات، د ارزونې، استملاک او بيا مېشتېدنې رییس مولوي سيف الله الیاس، د اوبو او انرژۍ وزارت او د اراضۍ ریاست د تصفيې، کدستر او استملاک رياستونو يو شمېر کارکوونکو ګډون درلود.
په پیل کې د ارزونې، استملاک او بيا مېشتېدنې ریاست مسوولینو د للندر (شاه توت) بند د خلکو د ځمکو د او کورونو د دوسيو په هکله په خپلو خبرو کې وويل: «د استملاک په برخه کې د ۱۳۰ دوسيو کارونه په بشپړه توګه تکميل شوي او پاتې ۲۰۰ دوسيې نا تکميله دي، چې کار په روان دی او په لنډو ورځو کې د هغو دوسيو کارونه هم بشپړېږي.»
ورپسې د استملاکي پروژو د همغږۍ رييس شاه جهان جلات اړوندو څانګو ته لارښوونه وکړه تر څو هغه دوسيې چې کارونه يې په بشپړه توګه تکميل شوي د هغو لپاره دې مربوطه څانګه خپل ټيمونه سیمې ته واستوي او په پاتې دوسيو باندې دې کار ګړندۍ کړي.
ښاغلي جلات زیاته کړه د ټيمونو د استولو په اړه چې د کابل د اراضۍ څخه وي يا هم د اراضۍ لوی ریاست څخه او همدارنګه د هغو خلکو په اړه چې ځمکې او کورونه يې په دغه پروژه کې له منځه ځي د هغو د بدیل او جبران خسارې په پار د اراضۍ لوی ریاست له رهبري سره ترغونډې وروسته به پرېکړه وشي.
نوموړي همدارنګه د اوبو او انرژۍ وزارت مسوولينو ته هم لارښوونه وکړه ترڅو يادو ټيمونو ته د هغو د اړتيا مطابق لکه د موټرو او داسې نور سهولتونه برابر کړي.
په پای کې په ياده موضوع کې ښکېل د ټولو برخو مسؤلینو د هر راز همکارۍ ژمنه وکړه.
