د اراضۍ لوی ریاست: ارزګان ولايت کې د ځمکو د تثبيت چارې بشپړې شوې
۳ سلواغه ۱۴۰۳ھ.ش
۲۲ رَجَب المُرَجَّب ۱۴۴۶ه.ق
د عالیقدر امیرالمؤمنین (حفظه الله تعالی) د حکم په اساس صنعت او سوداګرۍ وزارت لپاره د هېواد په کچه په هر ولايت کې د زر جريبه ځمکې د تثبيت او انتقال په پار د صنعتي پارکونو د جوړولو په موخه د يو شمېر ولايتونو تر څنګ ارزګان ولایت کې هم د ځمکو د تثبيت چارې بشپړې شوې.
په دغه پروګرام کې، چی د کرنې وزارت اراضۍ لوی رياست لخوا په لاره اچول شوې وه د اراضۍ لوی ریاست د ځمکو معلوماتي سيستم او ځمکو بانک رییس انجنیر احسان اللّٰه الهام، د ارزګان والي او د دغه ولايت د مختلفو څانګو مسؤلينو په شتون کې د يادې ځمکې د تثبيت اسنادونه په رسمي بڼه لاسلیک شول او دغه سندونه به د نورو اجراادآتو په موخه مرکز ته واستول شي.
په پای کې د ارزګان ولایت مسؤلينو په یاد ولايت کې ددغه کار د پایلې څخه خوښي څرګنده کړه او دا کار يې د هېواد د پرمختګ او آبادی په برخه کې ښه ګام وباله.
