کندهار کې د پستې ۱۰ زره او ۶۲۴ نیالګي پیوند شول
۴ لړم ۱۳۹۸
د کندهار دکرنې، اوبولګولو او مالدارۍ ریاست د مرسي کور بدیل معیشت پروګرم په همکارۍ د دې ولایت په اتو ولسوالیو کې د پستې بڼونو د پیوند چارې بشپړ کړ. د کندهار د کرنې ریاست چارواکي وایي، چې په دې لړۍ کې د پستې ۱۰ زره او ۶۲۴ نیالګي پیوند شوي او ترڅنګ یې د پستې بڼوالو ته د پیوند عملي لارې چارې هم ښودل شوي دي.
د کندهار د کرنې ریاست وایي، چې د همکارو موسسو او خلکو په همکارۍ په تېرو درېوو کلونو کې په دې ولایت کې د پستې څه باندې دوه زره جریبه نوی بڼونه جوړ شوي دي، چې ډېره ښه پایله یې هم ور کړې ده.
د کندهار د کرنې ریاست چارواکي وایي، چې په راتلونکو څو کلونوکې د انارو، انګورو او انځرو ترڅنګ پسته به هم ددې ولایت د صادراتو په لست کې شامل شي.
په کندهار کې د پستې دوه زره جریبه نوي بڼونه په داسې حال کې جوړ شوي دي، چې یاد ولایت د تازه مېوو له ډلې انګور او انارو په برخه کې مخکښ ولایت دی. د دغو بڼونو ښې پایلې نور کروندګر هم هڅوی، چې په خپلو ځمکو کې د پستې بڼونه جوړ کړي.
