د ننګرهار دکانال شرکت رییس د کرنیزو شرکتونو د ټولنې له چارواکو سره وکتل

۱ تله ۱۴۰۳ه‍.ش
۱۹ رَبِیعُ الْأَوَّل ۱۴۴۶ه‍.ق
د ننګرهار وادي کرنیز  شرکت رییس سید محمد نعیم «محمدي» نن د خپل کار په دفتر کې د کرنیزو شرکتونو د ټولنې له رییس شاه محمود، ددغې ټولنې مرستیال اسلام الدین او یوشمېر نورو چارواکو سره په کتنه کې، ددوی غوښتنې او وړاندیزونه واورېدل.
ددې لیدنې په ترڅ کې یادو چارواکو د ننګرهار وادي کرنیز شرکت له رهبرۍ څخه مننه وکړه، چې  په دې لنډو ورځو کې يې ددوی د اوبو کمښت ستونزې ته مثبت ځواب ووایه او عملي ګامونه يې پورته کړه، د یادې ټولنې په وینا دغه ستونزه يې نږدې ۷۰ سلنه ختمه کړه، موږ ترې د لا زیاتو عملي ګامونو د پورته کولو غوښتونکو یو او په دې برخه کې هر زار همکارۍ ته چمتو یو  .
ددغې ټولنې مرستیال حاجي اسلام الدین وړاندې وویلې، موږ سره په دغې اتحادیه کې نږدې ۳۰۰ کرنیز شرکتونه ثبت دي « دا ټول د ننګرهارکانال شرکت د ځمکو قراردادي کرنیز شرکتونه دي» یاد ټول کرنیز شرکتونه د کانال د ابادۍ او پرمختګ ته ژمن دي او د بشپړ همکارۍ ډاډ درکوو . 
ورپسې د ننګرهار وادي کرنیز شرکت رییس سېدمحمد نعیم «محمدي» خبرې وکړې او زیاته يې کړه، چې د ننګرهارکانال د هېواد د سترو کرنیزو، اقتصادي او ټولنیزو پروژو څخه ده، ددې سترې او ملي پروژې ابادي، پرمختګ زموږ او ستاسو د ټولو ګډه دنده ده.
موږ پلان لرو چې، د اوبولګولو عصري سيستم په مټ به شاړې دښتې تر کرکیلې لاندې راولو، زيتونو او ستروسو د ډولونو رواجولو ته کار به لا زیات کار وکړو، دميکانيزه کرنيز سيستم ته به کوټلي ګامونه پورته کړو او د نورو برخو ودې او پراختیا ته به هم کار وکړو.
نوموړې وویل، چې د اوبو د کمښت ستونزه اوس یوازې د ننګرهارنه بلکې د ټول افغانستان او حتی نړۍ شموله ده، کله چې زموږ د ډرونټې د اوبو بند کاسه ډکه وي نو په لوی نهر کې به اوبه پرېمانه وي، چې کله کاسه تشه وي نو اوبه کمېږي.
 همدارنګه د اوبو کمښت ستونزه د اوبو څخه ناسالمه ګټه پورته کول دی، چې له بده مرغه زموږ یو شمېر هېوادوال ترې سالمه ګټه نه پورته کوي . «زه پلان لرم، چې د لوی نهر د اوبو سیستم د عدل او انصاف له مخې داسې برابر کړم چې هرې ویالې او کلي ته د نوبت سره سمې خپلې اوبه او حق ورسېږي.»
باید وویل شي، چې د ننګرهار وادي کرنیز شرکت لوی نهر کابو ۷۱ کیلومتره اوږدوالی لري، دا لوی نهر د اوبو ۳۷ ویالې لري، چې په یوه ثانیه د درې مترمکعب ظرفیت باندې ۳۱ زره هکټاره ځمکې خړوبوي.