د هرات د «انګورو او شاتو» څلورمه جشنواره

mail-admin
چهارمین «جشنواره‌ی انگور و عسل» هرات آغاز شد

Event dates

Event dates -

Location هرات

د هرات د «انګورو او شاتو» څلورمه جشنواره پیل شوه

۳۱ زمری ۱۳۹۸
په هرات کې د انګورو او شاتو څلورمه جشنواره پیل شوه. دغه جشنواره د زرګونو کسانو په شتون کې په هرات ولایت کې په لاره واچول شوه. ددې جشنوارې ګډونوال چارواکي او مسوولین، بزګران، تولیدوونکي او د هرات ولایت د کورنيو تولیداتو پېرېدونکي او پلورونکي وو او دغه راز ددې جشنوارې په پرانیست غونډه کې د کوپراټیفونو غړي، د ولایتي شورا غړي، د رسنیو استازو او د ترکیې، اذربایجان، ایران او ازبیکستان هېوادونو ډیپماټیک استازي شتون درلود. د هرات ولایت د انګورو او شاتو جشنواره او د کرنیزو توکو او مالدارۍ محصولاتو نندارتون د درې ورځو لپاره ادامه لري. ددې نندارتون په ۵۲ غرفو کې بېلابېل انګور او شات نندارې ته اېښودل شوي دي.

د یادې جشنوارې په پیل کې د تولیدوونکو ټولنو او بزګرانو له خوا په دې ولایت کې د کرنې د پرمختیا په برخه کې د کرنې وزیر د کړنو په درناوی نصیر احمد درانی ته ستاینلیک ورکړل.

ددې جشنوارې په پرانیست غونډه کې د کرنې، اوبولګولو او مالدارۍ وزیر نصیر احمد درانی په خپلو خبرو کې د کورنیو محصولاتو د بازراموندنې په برخه کې ددې جشنوارې او نندارتون رول اغېزناک وباله. د کرنې وزیر وویل: «هرات کې بڼوالۍ پراختیا موندلې، د کرنې په برخه کې، هرات د یوې پرمختللي ولایت ښه بېلګه ده، ددې ولایت لپاره لویې پروژې په پام کې نیول شوي دي. د مسلخ په جوړولو کې شپږ میلیونه ډالر پانګونه شوې، چې د جوړولو چارې یې هم بشپړ شوي دي، د سیلو او د اسټراټژیکو زېرمو د جوړولو د بنسټ ډبره به هم تر راتلونکو دوو میاشتو پورې کېښودل شي.»

د کرنې وزیر وویل «د هرات د مالدارۍ برخې ته هم پاملرنه شوې ده، زموږ هلې ځلې دادي چې پانګونې ډېرشي، د افغانستان د مېوو صادرات ډېر شوي دي. نور هېوادونه زموږ د مېوو د صادراتو هرکلۍ کوی، پانګوال باید کار وکړي، موږ یې تشویقوو او مالي مرستې ورسره کوو.»

دغه راز د هرات والي عبدالقیوم رحیمي په دې ولایت کې د کرنیزو پروژو د پلي کولو په پار د کرنې وزیر څخه مننه وکړه او ویې ویل، چې په هرات کې د مالدارۍ په برخه کې ښه بدلونونه رامنځته شوي دي. د هرات والي وویل: «په هرات کې سږکال ۱۵۰ ټنه شات او ۱۳۵ ټنه انګور تولید شوي دي، سږکال په هر برخه کې زموږ تولیدات ډېر شوي دي.»

د هرات والي دغه راز د زیتونو په برخه کې پر پانګونې هم ټینګار وکړ.

په همدې حال کې ښاغلي حیدري د تولیدوونکو ټولنو او بزګرانو په استازي توب وویل: «د بڼوالۍ په برخه کې پاملرنه شوې ده، خو د مالدارۍ په برخه کې د لا زیاتو پاملرنې غوښتونکي یو، څړځایونه باید ورغول شي او د مالدارۍ د ودې زمېنې دې باید لا هم زیاتي شي.»

دغه راز د هرات د ولایتي شورا مرستیال توریالی طاهري وویل: «د کرنې وزیر چې موږ سره کومې ژمنې کړی وو خپلې ژمنې پلي کړي دي او د خلکو په استازي توب موږ د کرنې وزیر څخه مننه کوو.»

د هرات ولایت د کرنې ریاست چارواکي وایي، چې ددې ولایت د انګورو سږنۍ حاصلات د تېر کال په پرتله ۱۵ سلنه زیاته شوې ده او ۱۳۵ زره ټنو ته رسیږي.

لعل، فخري، کشمشي، عسکري، پوشنګي، حسیني، میراحمدي، روچه، طاهري او شندوخاني د هرات ولایت تر ټولو نوم وتي انګور دي. تر دې دمه د صادراتو او د هرات د بڼونو د پراختیا ترڅنګ د کرنې وزارت له خوا ددې ولایت د انګورو بڼوالو لپاره ۴۰۰ عصري ممیز خونې هم جوړې شوي دي.

باید وویل شي، د کرنې وزارت په پام کې لري، چې سږکال په هرات ولایت کې د بېلابېلو پروژو په برخه کې ۹۱۱ میلیونه افغانۍ ولګوي.

34.352865, 62.2040287