لغمان کې د اوبولګولو د یوې پروژې رغنیزې چارې بشپړ او ګټې اخیستنې ته وسپارل شو
د لغمان دکرنې، اوبولګولو او مالدارۍ ریاست د ملګرو ملتونو پراختیایي ادارې په مالي او د سولې بنیاد مؤسسې په تخنیکي همکارۍ ددې ولایت د قرغیو په ولسوالی کې د ۱۰۵۰ متره کانال او سربند پروژې چارې بشپړ او ګټې اخیستنې ته سپارلی دی.
د چارواکو په خبره ددې پروژې ټولیز لګښت ۶۸ زره امریکایي ډالرو ته رسېږي، چې په پروژه کې شامل سربند او کانال په پاخه او اساسي ډول روغول شوي دي.
په دې اړه جوړه شوې غونډه کې، د لغمان دکرنې، اوبولګولو او مالدارۍ رییس الحاج مولوی محمد ولي محسن، د اقتصاد رییس مولوي جان محمد حامد، د سولې بنسټ مؤسسې ولایتي مسؤل محمدحارث رضا، دیادې سیمې قومی مشرانو، بزګرانو، ځوانانو، او د همکارې مؤسېسې مسؤلینو شتون درلود.
د سولې بنسټ مؤسسې ولایتي مسوول وویل، چې یاده پروژه کې د ۱۰۵۰ مترو په اوږدوالی کانال او سربند شامل دي، چې د اوبوکنټرول په پار ۱۸ دروازې لري او په ۷۲ کاري ورځو کې د ۶۸ زره امریکایي ډالرو په لګښت په پاخه او اساسي ډول رغول شوی دی، چې ورسره ۵۷۰ جریبه کرنیزه ځمکه خړوبېږي.
په همدې حال کې د لغمان دکرنې، اوبولګولو او مالدارۍ رییس الحاج مولوي محمد ولي محسن د تطبیق کوونکي پروژې له مسؤلینو څخه مننه وکړه، چې د پروژې دچارو په بشپړېدو کې خپلې هڅې ترسره کړي، په ورته وخت کې محسن د سیمې له خلکو وغوښتل چې د پروژې په ساتنه کې بشپړه همکاري وکړي نوموړی د سیمې خلکو ته ډاډ ورکړ چې هڅه کوي ترڅو د همکارو مؤسسو له لارې د اوبولګولو پروژو سربېره د سبو او غله جاتو په برخو کې داصلاح شویو تخمونو دتوزیع پروګرامونه پلي کړي.
