د بڼوالۍ ځنځیري ارزښت د پراختیا پروژه د څاڅکي اوبوخور ۴۵ سیسټمونه جوړوي
۲۴مرغومې ۱۳۹۹
د کرنې، اوبولګولو اومالدارۍ وزارت په کرونده کې د اوبو د ښه مدیریت په پار د۱۴۰۰ام مالي کال په ترڅ کې د بڼوالۍ ځنځیري ارزښت د پراختیا پروژې (HVCDSP) له لارې د هېواد په شپږو ولایتونو کې د څاڅکي اوبوخور ۴۵ سیسټمونه جوړوي.
د څاڅکي په سیسټم سمبال یاد اوبوخور د میدان وردګ، لوګر، خوست، کونړ، لغمان او ننګرهار په ولایتونو کې جوړیږي.
د څاڅکي په بڼه اوبولګول د موضعي یا میکرو اوبولګولو له سیسټمونو څخه دی، چې په دې سیسټم کې اوبه په لږ فشار سره څاڅکي څاڅکي د ګیاوو رېښې ته رسیږي. په دې سیسټم کې اوبه ورو ورو او څاڅکي څاڅکي د ګیاوو رېښوو ته رسیږي، چې د اوبو د سپما لامل او د ضایعاتو مخه نیول کیږي.
د څاڅکي اوبوخور سیسټم د اوبولګولو له نورو لارو چارو لکه سطحي او باراني څخه غوره لارې چارې دي.
