د هلمند مرکز کې د ډاکار مؤسسې له فعالیتونو څارنه وشوه

دهلمند ولایت دکرنې، اوبولګولو او مالداری  ریاست په لارښؤنه، د مؤسساتو د فعالیتونو د مؤثریت په موخه، د څارنې او ارزونې تخنیکی پلاوی لخوا چې په ترکیب کې یې ددې ریاست تخنیکي او مسلکي سلاکار ماسټر جان اقا بشیري، د مالدارۍ او حیواني روغتيا  مدیر انجنیر محمد  اسلم او د بوټوساتنې او قرنطین عمومي مدیر ماسټر نجیب الله حکیمي شامل دي، د دې ولایت مرکز لښکرګاه د کرنیزو خدمتونو مسؤل په همکارۍ، له افغان کډوالو سره د مرستې لپاره د ډنمارک کمیټې (ډاکار) مؤسسې له فعالیتونو څارنه او ارزونه ترسره کړل.
دیادې څارنې په ترڅ کې  د کورنیو چرکانو او وزو له فارمونو، د جوارو ننداریزو قطعاتو، د حیواناتو دغوجلو د اصلاح، د حیواني کلینیک او د موټر سیکل د برخې شل کسیزې روزنیزې پروسې چارې په هر اړخیزه توګه وارزول شول او په اړونده برخو کې مسؤلینو ته لازمې سپارښتنې وشوې.
د یادولو وړ ده، چې د هلمند دکرنې ریاست هڅه کوي ترڅو د بزګرو، مالدارو او بڼوالو د کرنیز اقتصاد پیاوړتیا په موخه په بېلابېلو برخو کې د پام وړ خدمات وړاندې کړي ترڅو د کاري بوختیاو ترڅنګ یادې کورنۍ په ځان بسیا شي.