د کرنې په برخه کې د تحصیلي بورسیو د زیاتوالي په پار د هند مرستیال سفیر سره د کرنې وزیر کتنه

۲چنګاښ ۱۴۰۰
د کرنې، اوبولګولو او مالدارۍ وزیر ډاکټر انوارالحق احدي، په کابل کې د هند مرستیال سفیر راغورام اس سره، د افغانستان د کرنې په برخه کې د مرستو په پار خبرې وکړې.
د کرنې وزیر په دې کتنه کې د هندمرستیال سفیر څخه وغوښتل، چې د کرنې اوړندو رشتو کې د متخصصینو د روزنې په پار له ډلې د بڼوالۍ په برخه کې بورسیې ځانګړې کړي.
په کابل کې د هند مرستیال سفیر راغورام اس وویل، هېواد یې علاقه لري، چې افغان زده کړیالانو ته د بورسیو ورکولو ترڅنګ، د کندهار پوهنتون د کرنې د برخې ملاتړ هم وکړي او وړتیایې لوړ کړي. هغه دغه راز وویل، چې په افغانستان کې اوس هم هند دکرنې سکټور دملاتړ په برخه کې پروژې لري، چې له نورو وزارتونو سره عقد شوي دي.
د کرنې وزیر وویل، چې د کرنې اړوند پروژې دې له دې وروسته د افغانستان د کرنې وزارت سره په همغږۍ پلي شي.