د بند امیر د زرغونتیا د طرحې پلی کېدل پیل شو
۱۴ غویی ۱۴۰۰
د کرنې، اوبولګولو او مالدارۍ وزارت د ۴۰ میلیونه افغانیو په لګښت د بند امیر ملي پارک د زرغونتیا د برنامې د پلي کېدو لړۍ پیل کړ.
د کرنې وزارت په پام کې لري، چې د بېلابېلو نیالګیو د اېښودو او د ډول ډول علوفې تخمونو د کر له لارې د بند امیر سیمې زرغون کړي.
د کرنې وزارت ددې طرحې د پلي کېدو په پار چې د ولسمشر له خوا وړاندیز شوې د ه بامیانو ته پلاوی استولی دی. یاد پلاوی ددې ولایت له سیمه ییزو چارواکو سره د بند امیر د اړوندو سیمو د زرغونتیا جزییات شریک کړي دي.
د کرنې وزارت د طبیعي سرچینو لوی رییس رفیع قاضي زاده وایي، چې د بند امیر د زرغونتیا برنامه، اته کلنه برنامه ده او ددې طرحې د لومړنیو چارو د تر سره کولو په پار د کرنې وزارت سږکال ورته ۴۰ میلیونه افغانۍ بودیجه ځانګړې کړې ده.
رفیع قاضي زاده وویل، چې د صنعتي لرګیو د تولید په پار ژر رس او دېر رسه ونې کېنول او دغه راز د بند امیر اړوند په ۱۴ زره هکټاره ځمکه کې د ځنګل احداث، د آب رېزو تنظیم او په څلور زره هکټاره ځمکه کې د علوفې او نورو بوټو د کښت له لارې د خاورې او اوبو ساتل په دې طرحه کې شامل موارد دي. د طبیعي سرچینو لوی رییس وویل، چې په ټولیزه توګه د بند امیر اړوند ۱۷ زره شاړې ځمکې په زرغونو سیمو بدلېږي.
رفیع قاضي زاده وایي، چې دا طرحه به په اتو کلونو کې پلي شي او د پلي کېدو په پار یې څه باندې ۳۰ میلیون ډالر په پام کې نیول شوې ده.
د کرنې، اوبولګولو او مالدارۍ وزارت تر دې وړاندې هم کورنیو او بهرینو ګرځندویانو ته د اسانتیاوو برابرولو په پار د بند امیر د ناستې ځایونه، د پلي تګ لارې او سړکونه رغولي دي.
