د کرنې وزیر د ترکیې- افغانستان د دوستۍ ډلې رییس او د ترکیې د پارلمان د یوشمېر کمېټو له رییسانو سره وکتل

۲۰ کب ۱۳۹۹
دکرنې، اوبولګولو او مالدارۍ وزیر ډاکټر انوارالحق احدي، ترکیې ته د خپل سفر په ترڅ کې د ترکیې جمهوري حکومت په پلازمېنه انقره کې،  د مالدارۍ او کرنیزو همکاریو د هوکړه لیک تر لاسلیک وروسته، د ترکیې د کرنې او کلیو پراختیا کمیسیون رییس پروفیسور یونس قلیچ، د ترکیې د دوستۍ ډلې رییس ابراهیم آیدن او ددې ډلې له یوشمېر غړو سره جلاجلا وکتل او خبرې اترې وکړې.
دکرنې وزیر د ترکیې د کرنې او کلیو پراختیا کمیسیون رییس سره په کته کې، د افغانستان او ترکیې ترمنځ د وروستي هوکړه لیک پرلاسلیک خبرې وکړې. ښاغلی احدي وویل، چې دا هوکړه لیک هر اړخیزه هوکړه لیک ده او د پلي کېدو په پار یې عملیاتي پلان چمتو شوی دی. هغه په وروستیو ۲۰ کالو کې له افغانستان سره د ترکیې له همکاریو او مرستو مننه وکړه او وویل، چې د ترکیې هېواد له افغانستان سره په یاده موده کې خپل نیت ثابت کړی دی. ښاغلی احدي وویل، چې د ترکیې کرنه پرمختللی دی او په بېلابېلو برخو کې د افغانستان کرنې ته لارې چارې ښیي او روزنه ورکوي، دغه راز نوی هوکړه لیک په دې برخه کې له افغانستان سره د ترکیې مرستو او همکارو ته لا ډېرې لارې پرانیزي. د افغانستان اسلامي جمهوریت دکرنې وزیر دغه راز د خوړو صنعت او د کرنیزو محصولاتو پروسس په برخه کې له افغانستان سره د ترکیې د همکاریو غوښتنه وکړه.
د ترکیې په پارلمان کې دکرنې او کلیو پراختیا کمیسیون مشر پروفیسور یونس قلیچ وویل، چې افغانستان او ترکیه ورور هېوادونه دي او د افغانستان حکومت سره په بېلابېلو برخو په ځانګړې توګه دکرنې او ځنګلواۍ په برخه  کې همکارۍ د دوی د هېواد اصلي لومړیتوب دی.
ښاغلی قلیچ وویل، چې د ترکیې هېواد په سیمه کې د کرنیز انقلاب ښه بېلګه ده او په دې برخه کې هلې ځلې کوي، چې د ترکیې پارلمان له خوا د افغانستان او ترکیې ترمنځ روستۍ هوکړه لیک ډېر ژر تایید کړي او د عملي کېدو زمینه یې برابره شي. د ترکیې په پارلمان کې دکرنې او کلیوالي پراختیا د کمیسیون رییس د افغانستان اسلامي جمهوریت د کرنې وزیر ته وویل، چې دوی افغانستان سره هر ډول همکاریو ته چمتو دي.
وروسته د کرنې، اوبولګولو او مالدارۍ وزیر ډاکټر انوارالحق احدي د ترکیې په پارلمان کې د افغانستان – ترکیې د دوستۍ ډلې له غړو سره وکتل. په دې کتنه کې د اروپا ګډ کمیسیون مشر اسماعیل امره قره یول هم شتون درلود.
د افغانستان دکرنې وزیر د افغانستان او ترکیې د دوستۍ ډلې د جوړولو د نوښت په پار له ترکیې څخه مننه وکړه او وویل هیله لري، چې د دواړو هېوادونو ترمنځ اړیکې لا پیاوړي شي، دا ډله کولئ شي، چې ددغو اړیکو د پیاوړتیا په پار د اړیکو ښه پُل وي او په ټولو برخو کې له موږ سره همکاري وکړي.
ښاغلی احدي یادونه وکړه، چې د افغانستان او ترکیې د سیسټمونو ترمنځ ډېر ورته والي شتون لري او هیله لرو، چې د دواړو هېوادونو ترمنځ بېلابېلې برخې لا پیاوړي شي.
په همدې غونډه کې د افغانستان-ترکیې د دوستۍ ډلې مشر ابراهیم آیدن او غړي یې د دواړو خواوو د اړیکو پر پیاوړتیا خبرې وکړې. ددې ډلې مشر ابراهیم آیدن، د افغانستان او ترکیې ترمنځ د مالدارۍ او کرنیزو همکاریو د هوکړه لیک هرکلی وکړ او  وویل، چې دوی په بېلابېلو برخو له ډلې د کرنې په برخه کې د اړیکو د زیاتوالي غوښتونکي دي او غواړي، چې په اقتصادي او سوداکریز بعد کې د دواړو خواوو اړیکې پیاوړي کړي.
وروسته په داسې حال کې، چې د ترکیې د پارلمان یوشمېر غړي د انوارالحق احدي ملتیا کوله ښاغلی احدي د ترکیې د پارلمان له بېلابېلو برخو څخه لیدنه وکړه.
په دې غونډه کې د هېواد د نورم او اسټنډرډ ملي ادارې رییس عزیز احمدزی هم شتون درلود.