د افغانستان د سرو طلاوو حاصلات نږدې ۲۱ ټنو ته ورسېد

دکرنې وزارت د وروستیو مالوماتو له مخې د هېواد د زعفرانو «سرو طلاوو» سږني حاصلات نږدې ۲۱ ټنو ته رسېدلی دی.
هرات، بلخ، فاریاب، کندز، فراه او دایکندي هغه ولایتونه دي، چې د هېواد ترټولو ډېر زعفران تولیدوي.
د کرنې، اوبولګولو او مالدارۍ وزارت ویاند اکبر رستمي وایي: « د زعفرانو ۴۰۷ ننداریزې کروندې جوړول،۸۶۰ زعفران کارو مېرمنو ته روزنه ورکول، یوزر او ۸۸۸ نارینه و زعفران کارانو ته روزنه ورکول، زعفران کارانو ته په کرونده کې د ۲۰ روزنیزو برنامو ایجاد، د ۲۹ میلیونه او ۴۰۰ زره افغانیو په لګښت د هرات په ولایت کې د زعفرانو د څېړنیز انسټیټوټ ودانۍ جوړول او د زعفرانو ۱۸۵ زره او ۵۰۰ کیلوګرامه پیازو وېشل، په ۱۳۹۹یم کال کې د زعفرانو د کرکېلي د پراختیا او دودولو په پار دکرنې، اوبولګولو او مالدارۍ وزارت کړنې دي.
ښاغلی رستمي زیاته کړه: « په ۱۳۹۹یم کال کې په نږدې اووه زره او ۹۰۰ هکټاره ځمکه کې زعفران کرل شوې و. له دې ډلې د هرات په ولایت کې اووه زره او ۳۱۷ هکټاره ځمکه کې زعفران کرل شوې و او په ټولیزه توګه د نورو ولایتونو په نږدې ۵۰۰ هکټاره ځمکه کې زعفران کرل شوي دي.»
په هغو ولایتونو کې، چې زعفران ښه وده او حاصل ورکوي یاد بوټی د کرنیز کاروبار لپاره غوره فرصت دی. په همدې موخه په دې وروستیو کلونو کې بزګران د زعفرانو کرکېلي ته مخه کړې ده. دغه راز ددې ګران بیې بوټې د کرکېلي او ښې پایلې ترلاسه کولو په پار د کرنې کارپوهان یې د پراختیا په پار هڅه کوي.
د کرنې وزارت د ویاند په خبره د زعفرانو د کرکېلي دودولو په پار د زعفرانوپه برخه کې د کاوبار د توکو او د زعفرانو د پیازو وېش، په ۱۳۹۹یم کال کې د کرنې وزارت نورې کړنې وې.
باید وویل شي، دکرنې وزارت په پام کې لري، چې په ۱۴۰۰ام کال کې هم یاد فعالیتونو ته دوام ورکړي تر څو په راتلونکی کال کې هم د زعفرانو د حاصلاتو کچه لوړ شي.