د امید «OMAID» پروژه د کرنې وزیر ته وپېژندل شوه

۲۳مرغومې ۱۳۹۹
د امید «OMAID» د پروژې چارواکو دیوې غونډې په ترڅ کې، چې د کرنې وزارت د اوبولګولو او طبیعي سرچینو مرستیال حشمت الله غفوري هم ونده درلود ددې پروژې د مقدماتي کړنو، راتلونکو برنامو او د پروژې اړوندو نورو مسایلو په هکله د کرنې، اوبولګولو او مالدارۍ وزیر ډاکټر انوارالحق احدي ته مالومات وړاندې کړل.
په دې غونډه کې د امید د پروژې رییس حامد احمدي وویل، چې دا پروژه په ۲۰۲۱ام زېږدیزکال کې پیلیږي او تر ۲۰۲۶ام کال پورې ادامه لري. ښاغلی احمدي وویل، چې د امید د پروژې بودیجه ۱۷۰ میلیونه ډالر ده، چې د نړیوال بانک له خوا پرې کیږي.
ښاغلی احمدي وویل، چې د امید پروژه د کرنې، اوبولګولو او مالدارۍ وزارت او د سوداګرۍ او صنایعو وزارت ترمنځ یوه ګډه پروژه ده او ټاکل شوې، چې ددې پروژې له لارې د هېواد په پنځو زونونو کې پنځه صنعتي پارکونه جوړ شي.
د کرنې، اوبولګولو او مالدارۍ وزیر ډاکټرانوارالحق احدي ددې پروژې په هکله وویل، چې د امید پروژه به د پروسس په برخه کې لوی بدلون رامنځته کړي.