د کرنې وزارت د اوبولګولو او قدرتي سرچینو له مرستیال سره د اوبولګولو پروژو د پرمختګ راپور شریک شو
۱۱ وږی ۱۴۰۵ هـ.ش
۱۹ رَبِیعُ الْأَوَّل ۱۴۴۸ هـ.ق
په افغانستان کې د ملګرو ملتونو د پروژوي خدمتونو دفتر«یواناوپياس» چارواکو د دغه بنسټ د اوبولګولو پروژو او فعالیتونو د پرمختګ راپور، د کرنې، اوبولګولو او مالدارۍ وزارت د اوبولګولو او قدرتي سرچینو له مرستیال مولوي باز محمد فیضان سره شریک کړ.
په دې لیدنه کې، مولوي باز محمد فیضان د ودانیزو پروژو په برخه کې د بهرنیو بنسټونو او مؤسسو له فعالیتونو څخه د مننې ترڅنګ، د پروژو د پلي کولو پر مهال د همغږۍ پر اهمیت ټینګار وکړ او ډاډ یې ورکړ چې د کرنې وزارت به د ګټورو او پراختیايي پروګرامونو د پرمخ وړلو په برخه کې لازمې همکارۍ او ملاتړ ته دوام ورکړي.
ورپسې، په افغانستان کې د ملګرو ملتونو د پروژوي خدمتونو دفتر«یواناوپياس» چارواکو په کونړ، لغمان، بدخشان، تخار او غور ولایتونو کې د لمریزې انرژۍ یا سولري سیستم له لارې د اوبولګولو پروژو د پلي کېدو د بهیر په اړه معلومات وړاندې کړل.
د یاد بنسټ د مسؤلینو په وینا، د دغو پروژو اړوند د سربندونو د جوړولو، پایپونو او اړینو وسایلو د نصبولو چارې روانې دي او هڅه کېږي، چې یادې پروژې په ټاکل شوې موده کې بشپړې شي.
دغه پروژې د دې لپاره پلي کېږي، چې د سیندونو اوبه د وچو او غیرکرنیزو ځمکو د خړوبولو او د دغو ځمکو د کرنیزو ځمکو د ګرځولو لپاره ولېږدول شي او د کرنې وړ ځمکو د پراختیا زمینه برابره شي.
د دغو پروژو پلي کول د کرنیزو ځمکو په پراختیا، د اوبو د سرچینو په مدیریت او د کرنیزو محصولاتو په زیاتوالي کې مهم رول لري او د کرنیزو ځمکو د پام وړ برخې د خړوبولو زمینه به برابره کړي.
