پکتيا کې پر ۱۵۰ اړمنو کورنيو د مېږو د وېش لړۍ پیل شو
۷ غویی ۱۴۰۰
د پکتیا د کرنې، اوبولګولو او مالدارۍ ریاست د اړيکو دفتر د ټولنيزې پراختيا او پايښت لرونکي معشيت پروګرام په همکارۍ ددې ولايت مرکز ګرديز، سيدکرم، وزې ځدراڼ او ګرده څيړۍ ولسواليو پر ۱۵۰ بې وزلو کورنيو د مېږو د وېش لړۍ پیل کړی دی.
د پکتيا د کرنې، اوبولګولو او مالدارۍ محمد دين مومند وایي، چې د مېږو له وېش څخه يې موخه د هغو بې وزله کورنيو اقتصادي پیاوړتیا ده، چې سرپرستي يې د ښځو په غاړه ده.
مومند همداراز وویل، چې د مالدارۍ پراختيا، د کورنيو محصولاتو د کچې لوړوالی، په مالدارۍ کې د خلکو سالمه بوختیا او په ټوله کې د مالدارانو د اقتصادي وضعيت ښه والی ددې پروژې نورې موخې دي.
په همدې حال کې د اړيکو دفتر ولايتي مسوول شريف الله احساس وويل، چې د يادې پروژې ټوليز لګښت ۲.۴ميليونه افغانۍ دی، چې ۵۷ د مرکز ګردیز، ۴۰ د سيدکرم، ۳۸ وزې ځدراڼ او ۱۵ د ګرده څيړۍ د لیرې پرتو سیمو اړمنې کورنۍ پکې شامل دي.
