د کرنې وزارت: تر راتلونکو شپږو کلونو پورې یو میلیون جریبه عصري بڼونه جوړوو

۲۷ زمری ۱۳۹۸
د کرنې، اوبولګولو او مالدارۍ وزارت ددې وازارت په انګړ کې د هېواد د خپلواکۍ د سلمې کلیزې په ویاړ د تازه مېوو د نندارتون په پرانیست غونډه کې اعلان وکړ، یاد وزارت په پام کې لري، چې تر راتلونکو شپږو کلونو پورې یو میلیون جریبه مډرن او عصري بڼونه جوړ کړي.
د کرنې، اوبولګولو او مالدارۍ وزارت د اوبولګولو او طبیعي سرچینو مرستیال حشمت الله غفوري ددې نندارتون په پرانیستونکي وینا کې وویل، د وروستیو کلونو په ترڅ کې کڼ شمېر نوي بڼونه احداث شوي دي او له دې سره سره د کرنې وزارت په پام کې لري، چې تر راتلونکو شپږو کلونو پورې یو میلیون جریبه نور بڼونه هم جوړ کړي. هغه وویل: «بڼوالي د کرنې زړه ده، په دې برخه کې د دولت یوه اسټراټژیکه موخه داده، چې تر راتلونکو شپږو کلونو پورې په کابو یو میلیون جریبه ځمکه کې د انارو، انګور، زردالو، شفتالو، انځر او یوشمېر نورو ارزښت لرونکو مېوو نوي سوداګریز بڼونه جوړ کړي.»
دکرنې وزارت د اوبولګولو او طبیعي سرچینو مرستیال وایي، چې د بڼوالۍ په عصري او مډرنو سیسټومونو سره نوی بڼونه جوړول ډېر حاصل او ښه کیفیت لرونکي دي. هغه زیاته کړه، چې د بڼوالۍ له نوی سیسټومونو څخه ګټه پورته کول د حاصلاتو کچه لس چنده زیاتوی. ښاغلی غفوري وویل: «افغانستان د بڼوالۍ په برخه کې یو هم سفر پیل کړی او کوم نوښتونه چې تر سره شوي دي په کې متراکم، نیمه متراکم بڼونه جوړول او د چیله بندی سیسټمونه شامل دي دغه نوښتونه ددې لامل شوي، چې د دودیزې بڼوالۍ په پرتله د هربڼ محصول هم زیات او هم کیفیت یې ښه شي.»
په ورته وخت کې حشمت الله غفوري وویل، چې سږکال د بڼونو د حاصلاتو کچه د تېر کال په پرتله کابو ۲۰ تر ۳۰ سلنه زیاتوالی ښیي. د هغه په خبره، له نوي سیسټومونو څخه ګټه پورته کول او د یوشمېر بڼونو عصري کول او همداراز ورښتونه ددې لامل شوي، چې د بڼوالۍ محصولات ډېر شي.
د کرنې وزارت د اوبولګولو او طبیعي سرچینو مرستیال د خپلواکۍ د سلمې کلیزې په ویاړ د تازه مېوو نندارتون ته په شارې سره وویل: «نننۍ نندارتون، د افغانستان د تازه مېوو نندارتون دی، چې د هېواد د خپلواکۍ د بیا ترلاسه کولو د سلمې کلیزې په ویاړ جوړه شوې ده. نندارتونونه تل د افغانستان د کرنیزو محصولاتو لپاره د بازارموندنې یو ښه فرصت دی.»
حشمت الله غفوري وویل، چې د کرنې وزارت په کور دننه او له هېواده بهر د کرنیزو محصولاتو نندارتونونو جوړولو ته ادامه ورکوی تر څو د هغه په خبره د افغانستان د بزګرانو تولیدات د نړۍ لرو پرتو هېوادونو ته هم ورسیږي.