خوست کې د کرنیزو محصولاتو مدیریت ۶۸پروژې ګټې اخیستنې ته وسپارل شول
۱۳ سلواغه ۱۳۹۹
د خوست ولایت د کرنې، اوبولګولو او مالدارۍ ریاست چارواکي وایي، چې د کرنیزو محصولاتو مدیریت د طرحې په اډانه کې په خوست کې د ۶۸ زېرمتونو رغنیزې چارې بشپړې او ګټې اخېستنې ته وسپارل شول.
په دې اړه جوړه شوې غونډه کې د خوست والي او ددې ولایت یوشمېر سیمه ییزو چارواکو شتون درلود.
د خوست د کرنې ریاست چارواکي وایي، چې په دغو ۶۸ پروژو کې ۱۹ د پیازو او ۴۹ د کچالو زېرمتونونه شامل دي، چې د برخمن شویو بزګرانو په لس سلنې ونډې سره د خوست ولایت په مرکز او اړوندو شپږو ولسوالیو کې کرندګرو ته جوړې شوي دي، چې له دې لارې به کروندګر وکولای شي خپل راټول کړي حاصلات په کور دننه خوندي او د اړتیا په صورت کې بازار ته وړاندې کړي.
ددغو پروژو ټولیز لګښت ۳۷ میلیونه او ۳۸۰ زره او ۱۳۷ افغانۍ ده، چې ۹۰ سلنه یې د کرنې وزارت او لس سلنه نور یې برخمن شوي بزګران ورکوي.
یادې پروژې دکرنیزومحصولاتومدیریت، د بزګرانو د محصولاتو خوندي کولو او د دوی د عوایدو زیاتولو په پار د کرنې، اوبو لګولو او مالدارۍ وزارت له خوا د کرنیزو محصولاتو مدیریت د پروژې په اډانه کې پلي شوي دي.
