جمهوررئیس د کندهار کرنیز کمپلکس د بنسټ ډبرې اېښودلو مراسمو کې د ویډیو کنفرانس له لارې ګډون وکړ

د افغانستان اسلامي جمهوریت جمهوررئیس محمداشرف غني نن غرمه د کندهار کرنیز کمپلکس د بنسټ ډبرې اېښودلو په مناسبت چهار چنار ماڼۍ کې جوړه شوې غونډه کې ګډون او وینا وکړه.
د کندهار، زابل، هلمند او ارزګان مسوولین او یو شمېر مشران چې د ویډیو کنفرانس له لارې وصل وو، د کرنې، اوبو لګولو او مالدارۍ وزیر ډاکټر انوارالحق احدي دغې غونډې ته د وینا پرمهال جمهوررئیس او ټولو هیوادوالو ته د کندهار کرنیز کمپلکس مبارکي وویله. هغه زیاته کړه، جمهوررئیس  د اقتصادي ودې د اصل په توګه د ارزښت زنځیر په بشپړولو ټینګار کړی او دا کمپلکس یې ښه بېلګه ده.  
ډاکټر احدي وویل، دا کمپلکس هغه پرمختللې مفکوره ده چې د فکر او سوداګرۍ پوخوالی ښیي او د افغانستان د کرنې زیاتو ستونزو ته یې حل لارې وړاندې کړې دي.  د دغه کمپلکس له لوري  بزګرو ته د ماشینري او پورونه ورکړه، داخلي پروسس او معیاري محصولاتو له امله په نړیوالو بازارونو کې د هغو ارزښت او داخلي عواید لوړېږي چې د هیواد پرمختګ کې به رول ولري او حکومت د کرنیزو صنایعو ملاتړ کوي.
د کرنې، اوبو لګولو او مالدارۍ وزارت معین حشمت الله غفوري د هیواد پرمختګ کې د کرنیزې ودې او خصوصي سکتور رول ته په اشارې وویل، د کندهار کرنیز کمپلکس د سل میلیون ډالرو په ارزښت په شپږو پړاوونو کې په ۱۱۰۰ جریبه ځمکه د عینو مېنې صنعتي پارک کې جوړېږي چې د کارموندنې ترڅنګ د کرنیزې سوداګرۍ اډانه جوړوي. په هرات، بلخ، کابل او ننګرهار کې به هم دېته ورته کمپلکسونه جوړ شي.
ورپسې د افغانستان د خونو فدراسیون رئیس محمداسماعیل غضفر له جمهوررئیس څخه د خصوصي سکتور د همېنشي ملاتړ مننه وکړه او وې ویل، په دا وروستیو شپږو کالو کې پانګوالو او صنعتکارانو ته زیاته پاملرنه  او لازمې اسانتیاوې برابرې شوي دي.
د کندا فروټ کمپنۍ رئیس جلال الدین سعید جمهوررئیس څخه په مننې وویل، د کندهار کرنیز کمپلکس د جوړولو طرحه مو ستاسو په مستقیمه لارښوونه جوړه کړې. هیوادوال به ډېر ژر ستاسو د دې او نورو طرحو او برنامو عملي پایلې چې د دوی د هوساینې لامل شي، وګوري .
د کندهار والي روح الله خانزاده او د کرنې، اوبو لګولو او مالدارۍ وزارت معین حشمت الله غفوري د جمهوررئیس په لارښوونه د کندهار کرنیز کمپلکس د بنسټ ډبرې له اېښودو وروسته د خصوصي سکتور استازو د کرنې د احیا اتل تندیس جمهوررئیس ته ډالۍ کړ.
جمهوررئیس غني د کندهار د کرنیز کمپلکس د بنسټ ډبرې اېښودو مراسمو ته په وینا کې سعید، وزیرزي، پانګوالو او ټولو هیوادوالو ته د دغه کمپلکس مبارکي وویله. هغه زیاته کړه، خصوصي سکتور چې په سختو شرایطو کې یې پانګونه کړې، د ودې او سوکالۍ ګډه ژبه لري. د امنیتي او دفاعي ځواکونو په څېر دوی هم د هیواد د اقتصاد او ویاړ ساتندویان دي.
جمهوررئیس غني وویل، د کندهار کرنیز کمپلکس جوړونکو سعید او وزیرزي ته به مډالونه او د کرنې وزارت مرستیال حشمت الله غفوري ته به لومړۍ درجه تقدیرنامه ورکړل شي. هر څوک چې له پنځوس میلیون ډالرو زیاته پانګونه وکړي، د نورو اسانتیاوو ترڅنګ به په جمهوري ریاست کې جوړېدونکي یادګاري څلي کې  د هغوی نومونه ولیکل شي.
د هیواد جمهوررئیس څرګنده کړه، اقتصادي عالي شورا به د هیواد د هر زون په اقتصادي مسایلو بحث وکړي او په نورو زونونو کې به هم دېته ورته کمپلکسونه جوړ شي. هغه په ټینګار سره وویل، د ستونزو د حل عملي لاره باید موجوده وي او د پانګونې پر وړاندې ستونزې او خنډونه د منلو وړ نه دي. د ګمرکونو د ښه مدیریت لپاره بین المللي شرکتونو سره په مذاکره کې یوو.
جمهوررئیس وویل، د واضح طرحې په اساس باید پیسې په پانګه بدلې او د بزګرو، بڼوالو او ټولو عواید په اساسي توګه لوړ شي. د اوبو د مدیریت او ځمکنیو کوریډرونو چارې ادامه لري. هغه زیاته کړه، د کندهار په هوایي ډګر اساسي پانګونه کېږي، نو په دې اړه خپل مشخص وړاندیزونه شریک کړئ. ټاپي او ټپ پروژې به په لوی کندهار کې د عظیم بدلون لامل شي.
سرچینه: ARG - ارگ