خوست کې د صنعتي نباتاتو ۳۰ ننداریزې کروندې جوړېږي

۱۹ چنګاښ ۱۴۰۰
د خوست د کرنې، اوبولګولو او مالدارۍ ریاست په دې ولایت کې دصنعتي نباتاتو د کرکېلي د پراختیا او تولید زیاتوالي په پار د صنعتي نباتاتو ۳۰ ننداریزې قطعې جوړوي. یادې ننداریزې کروندې، چې ممپلي او سويابين په کې شامل دي د خوست ولايت په مرکز او ولسواليو کې جوړېږي.
د دغو ننداریزو کروندو د جوړولو موخه د صنعتي نباتاتو دودول دي.
د یادو ننداریزو کروندو په جوړولو سره، د برخمن شویو بزګرانو ترڅنګ نور بزګران هم کولی شي، چې د یادو بوټو د کرکېلي او روزنې لارې چارې زده کړي.
د خوست د کرنې، اوبولګولو اومالدارۍ ریاست په پام کې لري، چې د منظمو ترویجې او تشویقي برنامو په لاره اچولو سره په دې ولایت کې د یادو ارزښت لرونکو نباتاتو د تولید او پروسس صنعت پیاوړي کړي.