پکتیا کې د ځنګلونو د بیارغونې او پراختیا په پار ۶۵ زره نیالګي اېښودل کېږي

۱۷ وری ۱۴۰۰
د پکتیا ولایت د کرنې، اوبولګولو او مالدارۍ رياست اړوند د ځمکې او ځنګلونو د تلپاتې مدیریت پروژې له لورې د دې ولایت په احمد اباء او سیدکرم ولسواليو کې د ۶۵زره نیالګيو د کېښودو لړۍ  پیل شوی دی.
د پکتیا د کرنې، اوبولګولو او مالدارۍ رییس محمد دین مومند وویل، چې د يادو نیالګيو له ډلې ۵۵زره د چهارمغزو، پنځه زره د بادامو او پنځه زره د نښترو نیالګي دي،  چې ۳۴ زره يې په احمد اباء او ۳۱ زره يې په سیدکرم ولسوالۍ کې کېښودل کېږي.
د ښاغلي مومند په خبره ددې پروژې لګښت اووه میلیونه افغانۍ ده، چې  د ځنګلونو د بیارغونې او پراختیا په موخه پلي کېږي.
د پکتیا دکرنې رییس وویل، چې ددې پروژې په پلي کېدو سره به  ۶۰۰ هکټاره تخریب شوې ځنګلي سیمې بیا ورغول شي،چې د ځنګلونو په بیارغونې سره به د ژوند چاپېریال ته د ورپیښو زیانونو مخه ونیول شي.
مومند له بزګرانو وغوښتل، چې د اېښودل شویو نیالګیو خړوبولو، ساتنې او پالنې ته ځانګړې پاملرنه وکړي، ځکه ځنګلونه د چاپېریال په ساتنه کې مهم رول لوبوي، نوموړي په یادو ولسواليو کې د ځنګلونو د بیارغونې او پراختیا په برخه کې د یادو نیالګيو د کېنولو پروژه مهمه او حیاتي پروژه یاده کړه.
د پکتیا دکرنې ریاست وایي، ددې ولایت د ځنګلونو د بیارغونې او پراختیا په پار هلې ځلې ډېروي، ځکه ځنګلونه له یوه پلوه چاپېريال پاک ساتي، د سېلابونو مخه نيسي او د وحشي ژوو کورونه په خپله غيږ کي لري او د بل پلوه د طبي بوټو په وده او نمو کي مهم رول لوبوي اوهم زموږ لپاره پاکه او تازه هوا برابروي.