خوست کې د مېلمه کوټ بڼ د بیارغونې چارې په پیل سره د بزګرانو د زده کړې مرکز جوړېږي

۲ کب ۱۳۹۹
د خوست د کرنې، اوبولګولو او مالدارۍ ریاست وایي، چې په دې لایت کې د مېلمه کوټ بڼ د بیارغونې چارې پیل شوي دي، چې ورسره به په دې بڼ کې د بزګرانو د زده کړې مرکز « FLRC» جوړېږي.
په دې اړه جوړه شوې غونډه کې، د خوست والي تورن جنرال مهمند کټوازي، د کرنې رییس حفیظ الله شاه نوري، د اړیکو د دفتر مشر محمد علي ځدراڼ، د شمل خرم سیندیزې حوزې رییس، د یوالي او بدلون  کاروان مشر عبد الوالي واحدزي، یوشمېر نورو سیمه ییزو چارواکو، قومي مشرانو او یوشمېر بزګران ګډون درلود.
د خوست والي تورن جنرال مهمند کټوازی وویل، چې د کرنې، اوبولګولو او مالدارۍ وزارت د «NCADP» پروګرام تر چتر لاندې د اړیکو دفتر له خوا د نږدې ۶۳ زره امریکایي ډالرو په لګښت د بزګرانو د زده کړې او سرچینو مرکز «FLRC» جوړېږي.
د خوست والي وویل، چې یاد مرکز به د ولایت په کچه د بزګرانو، د کرنې د لومړنیو توکو د پلورونکو او واردوونکو، سیمه ییزو سوداګرو، د کرنې متخصصینو، د پوهنتون زده کړیالانو، د موسساتو، دولتي او غیر دولتي برنامو د کارمندانو تر منځ همغږي رامنځته کړي.
هغه وویل، چې د خوست ولایت کې د کرنې، اوبولګولو او مالدارۍ ریاست په غوښتنه یاد مرکز به د مېلمه کوټ په بڼ کې جوړېږي. چې ودانیزې چارې به یې په درو میاشتو کې بشپړ او ګټې اخیستنې ته به وسپارل شي.
په همدې حال کې، د اړیکو د دفتر مشر محمد علي ځدراڼ وویل، چې د یاد  مرکز په جوړولو سره به بزګران وکولی شي، چې خپلې ستونزې په خپل وخت د کرنې ریاست کارکوونکو سره شریک او حل لاره ور ته پیدا کړي، او ترڅنګ یې بزګران کولی شي، چې بېلابېلو کرنیزو مالوماتو ته لاس رسي پیدا کړي.
 دغه راز د خوست د کرنې رییس حفیظ الله شاه نوري په خپلو خبرو کې وویل، چې په دې مرکز کې به د لومړنیو توکو پلورونکو، وارودونکو او سیمه ییزو سوداګر کولی شي  مختلفې جلسې تر سره کړي او خپل معلومات له یو او بل سره شریک کړي. همدا راز د پوهنتون زده کړیالان کولی شي، چې په نوموړي مرکز کې بېلابېلې څېړنې وکړي.
همداراز په دې غونډه کې د ۱۲ ولسوالیو د ترویج مدیریتونو، د کرنې د شمل خرم سیندیزې حوزې ریاست مامورینو ته د نږدې ۱۱۵ زره ډالرو په ارزښت اړینې توکي او ۲۴ عراده موټرسایکېلونه ورکړل شول. دغه توکي چې د یادو کارکوونو د وړتیا لوړلو په پار وېشل شوي دي په کې کمپیوټرونه، پرینټر، دفتري میزونه، چوکۍ، د اسنادو ساتلو المارۍ، د انټرنیڼ اسانتیا، کرنیزې توکي لکه قیچي ګانې او دواپاش، غږیز سیستم او د مامورینو د ترانسپورټ لپاره ۲۴ موټرسایکل شامل دي.